Пред почетокот на полуфиналниот дуел на Светското првенство помеѓу Аргентина и Англија, аргентинскиот министер за надворешни работи, Пабло Кирно, дополнително ги затегна односите со навременото објавување есеј во кој се потврдува правото на Аргентина врз Фолкландските Острови. Тензиите веќе беа високи откако ја прославија аргентинските играчи својата победа во четврт-финалето пеејќи песни со антианглиски текстови, пишува „Дејли мејл“.
Кирно ја критикуваше „нелегалната окупација“ на Фолкландските Острови од страна на Велика Британија во колумна за „Ла Насион“, само неколку дена пред натпреварот в среда, во Атланта. Министер во Владата на Хавиер Милеи ги нарече жителите на островот, од кои 99,8 проценти гласаа да останат под британска власт на референдумот во 2013 година, „вештачки населени“.
Пописот од 2016 година покажа дека 43 проценти од населението на архипелагот е родено на Фолкландските Острови, а многумина се потомци на велшки и на шкотски имигранти што се населиле таму по воспоставувањето на британската власт во 1833 година.
– Времето не ја трансформира нелегалната окупација во суверенитет. Ниту, пак, ќе го наруши територијалниот интегритет на Аргентинската Република. Ние нема да се откажеме од нашето право, ниту ќе го напуштиме. Фолкландските Острови се историја, територија, море, сеќавање и судбина. Тие се завет меѓу генерациите. Тие се гласот на една нација што знае како да чека без да се откаже и да инсистира на своите барања без да се предаде напиша Кирно.
Тој, исто така, ја отфрли важноста на референдумите, сегашни или идни, додавајќи дека ниедно гласање „еднострано организирано од Обединетото Кралство не може да има правно дејство.
– Не смееме да паднеме во стапицата на референдумот – напиша тој.
Министерката за надворешни работи во сенка на Велика Британија, Прити Пател, беше меѓу првите што реагираа. Таа ги нарече островјаните, на кои им е доделено целосно британско државјанство од 1983 година, „горди Британци“.
– Најновите аргентински коментари за жителите на Фолкландските Острови се навредливи и неточни. Луѓето на Фолкландските Острови се горди Британци и нивното право на самоопределување е несомнено. Никаква ревизионистичка реторика од Буенос Аирес нема да го промени тоа. Велика Британија секогаш цврсто ќе стои покрај народот на Фолкланд – напиша Пател на платформата „Икс“.
Ова не е првпат оваа година Аргентина да ги потврди своите тврдења. Претседателот Милеи претходно изјави дека островите, познати во Аргентина како Лас Малвини, „биле, се и секогаш ќе бидат аргентински“. Во април, една белешка од Пентагон сугерираше дека САД би можеле да го преиспитаат својот став за поддршка на британскиот суверенитет, но државниот секретар Марко Рубио брзо го намали значењето на документот.
Конфликтот од 1982 година, во кој загинаа 649 аргентински и 255 британски војници, беше, исто така, чувствителна заднина на Светското првенство во 1986 година, кога Диего Марадона го опиша својот гол „Божја рака“ како „симболична одмазда“ за поразот во војната.
Пред натпреварот в среда, полицијата во Атланта се подготвува за сложена операција поради големиот број навивачи на двата тима што пристигнаа. Веќе се појавија снимки од помали судири меѓу аргентинските и англиските навивачи. Едната покажува како се тепа англиски навивач со три лица облечени во аргентински дресови на стадионот, додека другата покажува како се судираат групи навивачи во бар.
По победата над Швајцарија, играчите и навивачите на Аргентина ја испеаја преработката на „Muchachos, Esta Noche Me Emborracho“, хит од 2003 година, кој беше популарен и во текот на освојувањето на титулата во 2022 година.
Текстот на новата верзија гласи: „Јас сум навивач на националниот тим, го поддржувам од сè срце. Со Лионел ја освоивме нашата трета титула и сакаме повторно да бидеме шампиони. А 32 години подоцна, Скалонета ќе го одмазди трофејот украден од ‘десетката’, оној што не ни беше дозволено да го кренеме. Сакам да ја видам четвртата ѕвезда како свети на дресот. Јас сум Аргентинец од раѓање до гроб, за Малвините, за Диего, за последниот танц на Лео. Аргентина, сакам да те видам како двократен шампион по ред“.
