Златната олимпијка ќе се спонзорира од страница за возрасни за учество на ЗОИ

Голем број спортисти гледаат на секаков начин да дојдат до пари за да си ги финансираат своите кариери, а германската олимписка шампионка во боб, Лиза Баквиц (31), потпиша договор за спонзорство со онлајн платформата за возрасни, „Онли фанс“, за да го обезбеди своето учество на претстојните Зимски олимписки игри. Светската шампионка го користи ова за да собере средства за својот тим и подготовките, објавува „Билд“.

Пред Зимските олимписки игри во Италија, спортистката разјасни каква содржина нуди на платформата.

• Дефинитивно нема да се покажам гола, истакна Германката.

Баквиц објавува содржина, понекогаш во спортски градник, понекогаш во бикини или во боб одело, и комуницира со своите обожаватели, кои плаќаат месечна претплата од 24,99 долари (21 евро).

• За мене, тоа е среќна околност бидејќи ми овозможува да го финансирам мојот тим, нагласи светската шампионка од 2024 година.

Затоа, таа ја смета соработката со „Онли фанс“, која започна пред една година, за „најдобрата работа што ми се случила“.

Баквиц немаше ни приближно толку финансиски ресурси колку што има сега со традиционалните спонзори, особено имајќи ги предвид Зимските олимписки игри во февруари.

Други спортисти, исто така, сè повеќе се свртуваат кон неконвенционални методи како што се групно финансирање, голи календари или содржина на „Тик-ток“. Финансирањето од фондови за спортска помош, јавни извори и локални спонзори честопати не е доволно.

• Малку е тажно што не можам само да се фокусирам на мојот врвен спорт, продолжува Баквиц.

Дури и откако го освои олимпиското злато во 2018 година, таа мораше да се занимава и со маркетинг во исто време.

Инаку, Берлинката позираше и за „Плејбој“ во 2022 година.

• Секако, јас сум олимписка шампионка. Но, никој не го интересира што Лиза Баквиц има златен медал. Тоа е другата страна на медалот, за жал, истакна Германката.

Таа проценува дека сезоната во боб, вклучувајќи тренинг кампови, авионски билети, трошоци за опрема и награди за нејзините колеги, чини околу 50.000 евра. Ова се пари што таа ги собира и преку своите фотографии, видеа и активности на платформата.

• За мене, тоа е спонзор кој, заедно со Бундесверот, ми дозволува да спортувам. Значи, тоа е нешто сосема нормално, вели Баквиц, која признава дека сексуалноста е „секако тема“.