Украинскиот претседател Володимир Зеленски им се заблагодари на лидерите на Европската Унија и Обединетото Кралство во понеделник за нивната „поддршка и подготвеност да продолжат да ѝ помагаат“ на Украина, велејќи дека финансиската помош е од суштинско значење за отпорноста на Украина и додаде дека Русија го користи студот како оружје против неа.
„Денес, сите партнери потврдија дека во наредните години ќе продолжат да ја поддржуваат Украина, нашата земја, нашата отпорност, особено преку финансиска поддршка, што е клучно“, рече Зеленски на прес-конференција во Лондон по состанокот на Коалицијата на волјата.
Тој ја обвини Русија за спроведување „кампања на терор против енергетскиот систем на Украина“ со цел „зимскиот мраз да се претвори во оружје за тортура и притисок врз народот и одбраната“, објави „Скај њуз“.
Зборувајќи за состанокот на Коалицијата на волјата одржан претходно истиот ден, Зеленски ги повика земјите-партнери да „се фокусираат на она што е најпрактично и најефикасно“.
Тој додаде дека Украина промовира „посуштински пристап кон дипломатијата“, кој, како што рече, „има смисла само ако води до вистински одлуки“. Во исто време, тој повика на зголемен притисок врз Русија преку санкции и запленување на руски средства, му се заблагодари на американскиот претседател Доналд Трамп за санкциите воведени врз руските нафтени компании и повторно побара од САД да испорачаат крстосувачки ракети „Томахавк“.
„Не смее да има друга опција освен Русија да ја заврши војната и да го врати мирот во нашата земја“, заклучи Зеленски.
Во Лондон се одржува состанок на Коалицијата на волјата, на кој присуствуваат нови членови, вклучувајќи дополнителни 20 земји кои ќе се приклучат на заедничкиот повик за поголема меѓународна соработка и поддршка за Украина.
