ЗАПЛЕНЕТИ КОТУРИ САЈЛА СО ДИЈАМАНТСКИ ПРСТЕНИ, но и лекови, цигари…

Царината заплени лекови, цигари, маслиново масло и објективи за камери

Царинските службеници открија повеќе обиди за шверцување на разна стока, при што привремено се задржани котури сајла со дијамантски прстени наменети за сечење мермер, лекови, објективи за камери, цигари, маслиново масло и ремени за товар, соопштија од Управата.

„Запленети се 18 котури од по 10 метри сајла со дијамантски прстени, наменета за сечење мермер. Тие се откриени од страна на царинските службеници на граничниот премин Богородица, по извршен детален преглед во задниот дел во багажниот простор во ’ауди А8’ со косовски регистарски таблички управувано од косовски државјанин. Непријавената стоката била покриена со заштитна навлака за одело, врз која биле ставени три патни торби со личен багаж. Вредноста на непријавената стока е 664.200 денари“, соопштија од Царината.

Откриени се и 63 пакувања со разни лекови и медицински материјали  – сирупи, таблети, чепови, спрејови, клизми, ленти за бандажирање.

„Тие се откриени од страна на мобилни царински тимови, пронајдени во автомобил со германски регистарски таблички, управуван од македонски државјанин, пријавен за влез во државата на граничниот премин Табановце“, соопшти Царината.

Спречено е и шверцување на објективи за камери и на ремени за товар. Спречен е шверц и на 47 штеки цигари без акцизни маркички, а царинарниците заплениле и маслиново масло.

„472 лименки со вкупно 153 литри маслиново масло се пронајдени во просторот за резервна гума, како и во повеќе кутии и торби сместени во внатрешноста и во багажниот простор на автомобил со словенечки регистарски таблички, управуван од словенечки државјанин пријавен за влез во државата на граничниот премин Меџитлија“,соопшти Царинската управа.