Портпаролката на руското Министерство за надворешни работи, Марија Захарова, денеска изјави дека одбивањето на Литванија и Летонија да дозволат авионот со српскиот претседател Александар Вучиќ да ја прелета земјата на пат кон Москва е уште еден јасен случај на ограничување на сувереното право на државите да водат сопствена надворешна политика, пренесе агенцијата Тасс.
„Земјите од Европската унија продолжуваат да ја спроведуваат практиката на ограничување на сувереното право на државите да водат сопствена надворешна политика, користејќи ги сите расположливи средства за тоа. Денешното одбивање да се издаде дозвола за прелет е уште еден еклатантен пример за оваа практика“, посочи Марија Захарова.
Авионот со кој Вучиќ отиде во Москва за да присуствува на прославата на Денот на победата слета во руската престолнина околу 16 часот и 35 минути. денес, според веб-страницата за следење авиони globe.adsbexchange.com.
Претходно денеска авионот со Вучиќ принудно слета во Баку бидејќи немаше дозвола да го продолжи летот поради борбените операции на Русија и Украина во воздушниот простор.
