Компаниите за оружје никогаш не биле толку профитабилни како во 2024 година, покажува извештајот на Институтот SIPRI за 100-те најголеми компании за оружје во светот. Нивните приходи од продажба на оружје и воена опрема минатата година изнесуваа 679 милијарди американски долари, пишува Дојче веле.
Ова е зголемување од 5,9 проценти во споредба со 2023 година. Веќе во таа година, ескалацијата на геополитичките тензии, а пред сè војната во Украина, доведоа до зголемена побарувачка за оружје. Овој тренд само дополнително се забрза во 2024 година.
Од 100-те компании наведени во извештајот, 39 се со седиште во Соединетите Американски Држави, што ја прави земјата веројатно најважната локација за индустријата за оружје. Нејзините 39 компании сочинуваат речиси половина од глобалните приходи од бизнисот со оружје. Сепак, нивниот раст од 3,8 проценти е сè уште релативно скромен.
Што се однесува до 26-те европски компании (без Русија), тие поединечно забележаа мешани резултати, но заедно имаа зголемување на приходите од 13 проценти.
Компаниите од Германија беа особено успешни, зголемувајќи ги своите приходи за дури 36 проценти.
Русија е наведена посебно на ранг-листата на SIPRI. И не е изненадувачки што руските производители на оружје бележат значителен раст. Нивните приходи од извоз се намалија поради санкциите, но порастот на домашната побарувачка повеќе од доволно ги надомести тие загуби.
Азија е на трето место по САД и Европа, со 23 компании за оружје на листата на SIPRI. Азија е исто така единствениот регион во светот што бележи пониски приходи отколку во 2023 година. Компаниите од Кина, особено, забележаа значителен пад – за десет проценти. Ниту една друга земја во извештајот на SIPRI немаше таков пад.
