Ужас во Охајо: Шеснаесет деца пронајдени во ужасни услови

Четири лица се уапсени во американската држава Охајо откако полицијата пронашла 16 деца кои живееле во исклучително тешки и нехумани услови во куќа во селото Хамден. Неколку од децата биле во толку лоша здравствена состојба што веднаш им била укажана итна медицинска помош.

Истражителите од Бирото за кривични истраги на Охајо и членовите на локалната канцеларија на шерифот ја пребарале куќата во која, според нив, пронашле сцени кои надминуваат сè што некогаш виделе.

Главниот обвинител на Охајо, Енди Вилсон, изјавил дека децата живееле во услови „кои се тешки за замислување за луѓе, а камоли за деца“.

„Ова е најлошата сцена што сум ја видел во целата моја кариера. Тоа е чисто зло. Правдата ќе биде задоволена за овие деца“, изјавил Вилсон на прес-конференција.

Полицијата ги уапсила Гари Сајдерс помладиот, Гари Сајдерс постариот, Кристина Сајдерс и Елизабет Сајдерс. Сите се осомничени за тешко загрозување на безбедноста на децата, кривично дело од втор степен кое вклучува сериозни телесни повреди.

Според досегашните информации, децата биле на возраст од една и пол до 18 години. Неколку од нив претрпеле сериозни повреди, додека две биле итно префрлени во специјализирани трауматски центри.

Истражителите сè уште не кажале дали сите деца се во роднинска врска, но нагласиле дека случајот не е поврзан со трговија со луѓе. Според првичните наоди од истрагата, уапсените лица патувале често.

Истрагата за можна долготрајна злоупотреба и занемарување на децата е во тек, а се очекува осомничените да се појават пред суд подоцна денес. Полицијата вели дека јавноста ќе биде навремено информирана за нови детали за овој шокантен случај.