Украинците се пробија 15 километри низ цевки и заробија руски војници/ВИДЕО

Украинските сили се инфилтрираа зад руските линии во близина на Купјанск, во регионот Харков, откако поминаа приближно 15 километри низ подземни гасоводи, соопшти единицата „Хартија“ (Khartiya) од Украинската национална гарда.

Операцијата, со кодно име „Велес“, ја изведе единицата „Хартија“ во координација со други украински сили, наведоа од единицата. Командантот на „Хартија“, бригаден генерал Ихор Оболенски, изјави дека украинските сили проучувале како руските трупи користат подземни премини и претпоставиле дека тие ќе се обидат да ги искористат големите гасоводи што минуваат низ регионот Харков.

„Русите имаа намера да ги искористат гасоводите за да пробијат во нашата заднина. Затоа и ние се спуштивме под земја“, објасни Оболенски. Според „Хартија“, украинските војници се движеле низ гасоводите, а потоа го поврзале своето подземно напредување со операции на површината, вклучително и напади со беспилотни летала.

Од единицата соопштија дека за време на операцијата биле заробени повеќе од 30 руски војници, додека руските сили претрпеле над 100 жртви (загинати и ранети). „Киев индепендент“ не можеше независно да ги потврди овие бројки.

Ukraine's Khartiia Corps revealed details of Operation Veles on the Kupiansk axis. Ukrainian forces advanced more than 15 km through underground routes into the Russian rear, using a main gas pipeline, tunnels and other access routes while surface forces and drones supported the… pic.twitter.com/HVotiZEBlp

— NOELREPORTS 🇪🇺 🇺🇦 (@NOELreports) October 22, 2026

Оболенски објасни дека целта на операцијата била не само да се пресретнат руските трупи што се движат под земја, туку и да се осуетат тактиките што тие ги применувале на површината и од воздух.

„Ги предвидовме потезите на непријателот и ја совладавме тактиката за водење борбени дејствија под земја“, изјави тој, пренесува Index.hr.

Во неколку наврати, руските сили користеле гасоводи за тајно преместување војници во областа на Купјанск. Во јануари, украински војници известија дека запреле руски напад во кој учествувале околу 50 војници, кои се обиделе да напредуваат низ гасоводот „Сојуз“.

Неодамна, според единицата „Хартија“, руските војници кои се повлекувале во близина на Купјанск користеле цивили како жив штит. Тие однеле група луѓе – меѓу кои имало деца и постари лица – до гасоводот Шебелинка-Острогожск, ги натерале да влезат во цевката и да се движат низ неа кон територијата под руска контрола. Украинските војници изјавија дека не отвориле оган бидејќи таму имало цивили.