Делегациите од Украина и Русија вчера во Истанбул разменија меморандуми за разбирање за евентуално примирје со кое би се ставил крај на тригодишната војна и презентираа сосема различни идеи за тоа како треба да изгледа долгорочниот пат кон мирот.
Турскиот претседател Реџеп Таип Ердоган го опиша состанокот како извонреден и изрази надеж дека ќе може да ги собере рускиот претседател Владимир Путин и украинскиот претседател Володимир Зеленски на состанок во Турција, заедно со американскиот претседател Доналд Трамп.
Состанокот, кој траеше едвај еден час, се одржа еден ден по масовниот украински напад со беспилотни летала врз руските стратешки бомбардери, потсетува Ројтерс.
Делегации од Киев и Москва се состанаа во палатата Чираган на Босфорот на втора рунда разговори посредувани од Турција и САД, откако мировниот процес беше обновен минатиот месец за прв пат од раните фази на конфликтот. Според „Фајненшл тајмс“, претставниците на двете делегации не се ракувале и имало малку знаци што укажуваат на напредок кон можен договор.
Руските преговарачи вчера им предадоа на Украинците детален меморандум во кој се наведени условите на Москва за целосно прекин на огнот, изјави за новинарите по разговорите помошникот на Кремљ, Владимир Медински. Медински, кој ја предводи руската делегација, исто така рече дека Русија предложила дводневен или тридневен прекин на огнот во одредени области. „Предложивме конкретен прекин на огнот од два до три дена на одредени делови од фронтовската линија“, рече Медински, „за да можат командантите да ги соберат телата на своите војници“.
Украинската делегација, предводена од министерот за одбрана Рустем Умеров, објави меморандум пред вчерашниот состанок во кој предлага целосно и безусловно прекин на огнот, гаранции за безбедноста и територијалниот интегритет на Украина, како и мерки за градење доверба како основа за евентуален мировен договор.
Украина предложи одржување на уште една рунда преговори до крајот на јуни, но верува дека само средба меѓу украинскиот претседател Зеленски и Путин може да реши бројни спорни прашања, рече Умеров.
