Украина ги презеде телата на 1.212 загинати припадници на своите вооружени сили, објави „Киев Индепендент“.
Репатријацијата на телата беше спроведена како дел од договорите постигнати на руско-украинските разговори одржани во Истанбул на 2 јуни, кои се фокусираа на размена на затвореници и загинати војници.
Во операцијата учествуваа голем број украински институции, вклучувајќи ја Службата за безбедност на Украина (СБУ), вооружените сили, Министерството за внатрешни работи, Канцеларијата на народниот правобранител, Државната служба за вонредни ситуации и други безбедносни и одбранбени агенции. Операцијата беше поддржана и од Меѓународниот комитет на Црвениот крст.
Телата на војниците беа вратени од неколку региони погодени од војната – Харков, Донецк, Луганск, Запорожје, Херсон и Сумски области.
Украинското Министерство за внатрешни работи и Министерството за здравство соопштија дека форензичките тимови веднаш почнале со идентификација на останките со цел што поскоро да им ги вратат на нивните семејства.
На состанокот во Истанбул беше договорена и нова размена на воени заробеници, вклучувајќи тешко ранети и малолетни војници. Претседателот Володимир Зеленски тогаш изјави дека од двете страни може да се разменат до 1.200 лица. Русија, исто така, вети дека ќе предаде до 6.000 тела на убиени украински војници.
По состанокот во Турција, Украина и Русија веќе спроведоа две размени на заробеници на 9 и 10 јуни. Иако точниот број не беше веднаш објавен, украинските власти потврдија дека меѓу вратените има сериозно ранети, хронично болни затвореници, како и заробени за време на опсадата на Мариупол во 2022 година, кои поминале повеќе од три години во заробеништво.
На разговорите во Истанбул, Украина, исто така, предложи мировен план кој вклучува целосно прекин на огнот, размена на сите затвореници („сите за сите“), враќање на киднапираните деца и користење на замрзнатите руски средства за обнова на земјата. Русија сè уште официјално не одговори на предлогот, но тамошните медиуми информираат дека руската страна има добиено 27 загинати припадници за време на размената со Украина.
