Три жени избодени со нож на три различни метро станици во Париз

Три жени беа нападнати со нож на три различни метро станици во Париз, а полицијата уапси маж осомничен кратко по нападот, пишува Sky News.

Нападите се случија околу 16 часот по локално време на станиците Republique, Arts et Metiers и Opera. Канцеларијата на парискиот обвинител ги потврди нападите и изјави дека повредите на жртвите не се опасни по живот. Пожарникарите им укажаа прва помош, а весникот Le Parisien пишува дека две жени биле избодени во грбот и бутовите. Еден од сведоците на нападот на станицата Republique изјави за весникот: „Младата жена беше повредена во бутот. Имаше многу крв, раната изгледаше доста длабока“.

Осомничениот брзо уапсен

Осомничениот, маж на возраст од околу дваесет години, избегал од местото на настанот, но подоцна бил уапсен во својот дом, објави C News. Според соопштението на обвинителството, напаѓачот веќе ѝ бил познат на полицијата и бил идентификуван со помош на снимки од надзорните камери.

Париската полиција објави на социјалната мрежа X: „Благодарение на брзата акција на службите за итни случаи, осомничениот е уапсен. Им посакувам брзо закрепнување на сите три жртви кои беа полесно повредени и им беше укажана помош од службите за итни случаи, на кои им оддавам и почит.“ Локалните медиуми јавуваат дека е исклучена можноста за тероризам како мотив.