Четиригодишно девојче од Босна и Херцеговина го загуби животот во трагична несреќа во Италија, откако доживеало струен удар во семејна куќа каде престојувало кај своите баба и дедо.
Несреќата се случила на 19 јули во местото Мота де Конти, во италијанската покраина Верчели. По инцидентот, детето веднаш било пренесено во болницата во Казале Монферато, но и покрај напорите на лекарите, не успеале да го спасат неговиот живот.
Семејството на девојчето потекнува од Босна и Херцеговина, а според информациите, телото ќе биде пренесено во татковината.
Според првичните сознанија на италијанските истражители, постои сомнение дека девојчето се обидело да вклучи светло во една од просториите во куќата, при што дошло до струен удар. Надлежните сега проверуваат дали причината за несреќата можеби биле проблеми со електричната инсталација или неисправни и неизолирани жици.
По наредба на обвинителството во Верчели била извршена обдукција, а италијанските медиуми објавија дека кај девојчето била забележана повреда на прстот која може да укажува на контакт со електрична струја. Се испитува и дали во моментот на несреќата детето било босо, што би можело дополнително да влијае на последиците.
Обвинителството отвори истрага за да се утврдат сите околности под кои се случила трагедијата. Во куќата се вршат дополнителни проверки, вклучително и детална анализа на електричната инсталација, а дел од објектот е обезбеден за потребите на истрагата.
Соседите раскажале дека семејството се преселило во местото пред неколку месеци. Градоначалничката на Мота де Конти, Емануела Квирчи, изразила длабоко сочувство до семејството и порача дека целата локална заедница стои со нив во овие тешки моменти.
Истрагата продолжува, а надлежните институции треба да утврдат дали станува збор за несреќен случај или дали постоеле пропусти што придонеле за трагичниот исход.
