Христина Гаркавенко (19), ќерка на свештеник од Покровск во источна Украина, е осудена на 15 години затвор за велепредавство откако шпионирала за руската Федерална служба за безбедност (ФСБ), објави Си-Ен-Ен.
Во јули 2024 година, таа отишла во црквата на нејзиниот татко, го ставила мобилниот телефон на прозорецот и го насочила кон рутата по која оделе украинските трупи, пренесувајќи го снимката директно до руската разузнавачка служба.
Една година се допишувала со агент на ФСБ, испраќајќи му информации за локациите на украинските трупи и опрема во стратешки важниот Покровск.
Во ретко телефонско интервју од затвор, таа рече дека се согласила да помогне затоа што сакала да разговара со лицето, додека обвинителите велат дека нивниот однос бил повеќе од пријателски. Иако била платена, таа вели дека парите не биле нејзин главен мотив.
Според Безбедносната служба на Украина (СБУ), од почетокот на војната се отворени повеќе од 3.800 истраги за велепредавство, а повеќе од 1.200 лица веќе се осудени, повеќето од нив на 12 до 13 години затвор, додека некои добиле доживотни казни.
Обвинителите велат дека најчестата форма на предавство е пренесување информации на руската разузнавачка служба. СБУ предупредува дека Русија често регрутира луѓе преку Телеграм нудејќи „лесни пари“, а потоа постепено им доделува сè посериозни задачи, со уцена ако некој се обиде да се откаже.
Гаркавенко се изјасни за виновна и изрази каење, и сака да биде разменета и да оди во Русија, каде што има роднини. Украинските власти предупредуваат дека руските служби ги третираат своите агенти како „потрошлива стока“.
„Свесно одбрав да ѝ помогнам на Русија и сега се каам за тоа. Ги повредив моите најблиски и го уништив сопствениот живот“, рече таа.
Си-Ен-Ен го цитира и случајот на Ирина Ландуга, осудена на доживотен затвор затоа што му испратила координати на украински позиции на својот син во руската армија, што довело до гранатирање и смртни случаи.
Фотографијата може да ја погледнете на линкот
