Тинејџер се соочува со казна затоа што покажал среден прст пред камера за мерење брзина: Бизарен случај во Хрватска

Полициски службеници од Полициската станица Бјеловар завршија кривична истрага против 18-годишен мотоциклист за нарушување на јавниот ред и мир. Младиот човек возел мотоцикл со регистарски таблички од Бјеловар по улицата „Петра Бишкупа Вена“ во Бјеловар. Кога поминал покрај уред за мерење на брзина, тој го кренал средниот прст на левата рака кон камерата.

Полицијата заклучила дека тој со тоа „ги навредил омаловажил службените лица на полицијата при вршење на нивните должности“, и најавила дека ќе поднесе обвинение против него до надлежниот Општински суд. Според неофицијални информации, инцидентот се случил уште во април, кога младиот човек бил малолетник. Полицијата не го товари за пречекорување на дозволената брзина. Проблемот бил единствено гестот кон камерата.

Неофицијално, се дознава дека полицијата го води случајот согласно член 17 од Законот за прекршување на јавниот ред и мир и дека ќе предложи казна од 700 евра, пишува Индекс.

Член 17 од Законот предвидува дека секој што ќе ги омаловажува или навредува државните органи или службени лица, додека ги извршуваат или во врска со извршувањето на нивните должности или нивните законски наредби, ќе биде казнет со парична казна од 700 до 4.000 евра или до 30 дена затвор.

Полицијата поаѓа од фактот дека камерата е алатка што ја користат полициските службеници за да ја извршуваат својата работа и дека средниот прст што се покажува кон уредот всушност бил насочен кон нив. Адвокатот Фран Олујиќ, од друга страна, предупредува дека законот зборува за навреда на државен орган или службеник, а камерата не е ниту едното ниту другото.

Дали навредливиот гест кон уред може законски да се изедначи со навреда на лице, на крајот ќе одлучи судот. Младото момче засега не е казнето.

Адвокатот Олујиќ смета дека полицијата нема законска основа да покрене прекршочна постапка против тинејџер кој покажал среден прст на стационарна полициска камера за брзина во Бјеловар.

„Не беше навреда кон полицајците, глупаво е да се води таква прекршочна постапка. Полицијата го нарекува прекршок кога државен орган или службено лице е омаловажено или навредувано. Камерата не е ниту државен орган ниту службено лице“, изјави Олујиќ за RTL Direkt.