Страотни сцени од Букурешт! Експлозија уништи осумкатна зграда, има мртви и повредени/ВИДЕО

Силна експлозија се случи во петок наутро во Букурешт, на булеварот Рахова, а во несреќата три лица загинаа, а 17 беа повредени. Според сведоци, детонацијата била толку силна што ги потресла блиските згради.

Градоначалникот Стелијан Буждувеану потврди дека експлозијата е предизвикана од насобирање гас, но Инспекторатот за вонредни ситуации (ИСУ) сè уште не објавил детали.

Министерот за здравство Александру Рогобете објави дека во рамките на Министерството за здравство е формирана посебна група за координирање на медицинските интервенции по силната експлозија.

Тој прецизираше дека сите болници во градот го активирале Белиот план, а медицинските тимови работат на максимална готовност.

Двајца тинејџери се меѓу тешко повредените. Според „Еуроњуз Романија“, 17-годишно девојче било фрлено два ката од експлозијата. Таа била пренесена во болницата „Григоре Александруску“ и е во сериозна, но стабилна состојба.

„Донесени се две деца. 17-годишно девојче со торакална, абдоминална и кранијална политраума поради пад од висина, поточно од седмиот на петтиот кат, е во сериозна, но стабилна состојба. Таа сè уште е на интензивна нега. Има и 17-годишно момче со кранијална траума, тој е на одделот за неврохирургија“, соопштија од болницата.