Стотици жртви на „доктор од пеколот“: Ревматолог од Тексас труел здрави луѓе со лекови поради пари – го чекаат 10 години зад решетки

Д-р Хорхе Замора-Кезада од Мишн, Тексас, се изјасни за виновен за заговор за измама, повеќекратни обвиненија за измама во здравствената заштита и попречување на правдата. Тој беше осуден на 10 години затвор и три години условна казна.

Со години, 68-годишниот ревматолог лажно дијагностицирал хронични болести за да оствари милионски профит со наплаќање за непотребни тестови и третмани.

Обвинителите презентираа докази дека неговата шема вклучувала лажни побарувања до осигурителни компании во вредност од повеќе од 118 милиони долари, додека осигурителите исплатиле повеќе од 28 милиони долари.

Тој финансирал раскошен начин на живот – поседувал 13 имоти, приватен авион и „Масерати гран турисмо“.

„Д-р Замора-Кезада го финансирал својот раскошен животен стил две децении трауматизирајќи ги пациентите, малтретирајќи ги вработените, лажејќи ги осигурителите и крадејќи пари од даночните обврзници“, рече портпаролот на Министерството за правда на САД, Метју Р. Галеоти.

На судењето, други ревматолози од Тексас сведочеа дека прегледале стотици пациенти на кои Замора-Кезада лажно им дијагностицирал ревматоиден артритис – ниту еден од нив немал болест.

Сепак, на сите им биле дадени моќни лекови со сериозни и често фатални несакани ефекти. Некои претрпеле мозочни удари, атрофија на вилицата, опаѓање на косата, оштетување на црниот дроб и неподнослива болка што ги оставила неспособни.

Една жртва рекла: „Постојано бев во кревет, не можев сам да станам. Бев на лекови. Се чувствував како мојот живот да нема смисла“. Други се откажаа од колеџ затоа што се чувствуваа како да живеат во тело на постара личност.

Замора-Кезада, исто така, ги злоупотребувал своите вработени, честопати вработувајќи странски работници со визи J-1 за да може да ги уценува со отпуштање  и депортација. Вработените кои не ги следеле неговите наредби или не „произведувале“ доволно непотребни третмани биле отпуштени или злоупотребувани.

Пациенти на возраст од само 13 години биле лекувани во неговите ординации во Јужен Тексас и Сан Антонио.

Пресудата им носи олеснување на стотици жртви и нивните семејства. Иако многумина ќе имаат трајни последици по здравјето, тие знаат дека правдата е задоволена. Д-р Замора-Кезада мора да врати 28,2 милиони долари, вклучувајќи 13 имоти, приватен авион и луксузни автомобили.