Во срцето на Ново Лисиче започна реконструкцијата на постојното игралиште, кое ќе биде првото мултифункционално на територијата на Општина Аеродром. На него, покрај фудбал и кошарка, ќе може да се игра и тенис.
Станува збор за игралиште што ќе биде целосно реконструирано првпат од неговата изградба пред неколку децении. Игралиштето ќе добие сертифицирана мултифункционална подлога, за безбедна игра и спортување. Она што е ново е тоа што подлогата е соодветна и за играње тенис, со што аеродромци првпат ќе добијат современо спортско игралиште со јавни тениски терени, кои со поставувањето специјални мрежи ќе може да се приспособуваат според потребите на граѓаните.
– Аеродром е познат како општина каде што владее врвен спортски дух и токму во тој правец ќе продолжиме да создаваме уште подобри услови за развој на спортот во секој нејзин дел – соопштија од локалната самоуправа.
