Се зборува дека Хамнеи е на смртна постела, а неговото „зелено светло“ било клучно за договорот за прекин на огнот

Иранскиот врховен лидер Моџтаба Хамнеи му наредил на преговарачкиот тим да постигне договор со САД, што се случи за прв пат откако избувна конфликтот, објавуваат светските медиуми од нивни извори. Овој потег го отвори патот за двонеделен прекин на огнот и повторно отворање на Ормутскиот теснец, објави американскиот портал „Аксиос“.

Додека американскиот претседател Доналд Трамп јавно се закани дека целосно ќе го уништи Иран, интензивни дипломатски контакти се водеа зад затворени врати.

Во исто време, американските и израелските сили подготвуваа голема воздушна офанзива против иранската инфраструктура, додека медијаторите од Пакистан, Египет и Турција ги координираа промените во иранските предлози.

Хамнеи лично учествувал во процесот, комуницирајќи преку курири поради заканата од атентат, и токму неговото „зелено светло“ било клучно за постигнување договор.

Се вели дека иранскиот министер за надворешни работи, Абас Аракчи, одиграл „клучна улога“ во преговорите, особено во убедувањето на Исламската револуционерна гарда да го прифати договорот.

И покрај напредокот, Трамп во еден момент се закани дека „целата цивилизација ќе умре“, предизвикувајќи забуна дури и кај неговите најблиски помошници и сојузници, кои до самиот крај не беа сигурни каква ќе биде неговата конечна позиција.

По разговорите со израелскиот премиер Бенјамин Нетанјаху и пакистанскиот фелдмаршал Асим Мунир, Трамп се согласи на двонеделен прекин на огнот, по што на американските сили им беше наредено да се повлечат во рок од 15 минути од објавувањето.

Договорот, исто така, вклучува повторно отворање на Ормутскиот теснец за бродови, во координација со иранските сили. Сепак, останува непознато до кој степен ќе се одвива поморскиот сообраќај, како и колку строго израелската страна ќе се придржува до прекинот на огнот.

Се очекува понатамошните преговори да продолжат во Пакистан, каде што американската делегација ќе ја предводи потпретседателот Џ.Д. Венс. Почетокот на разговорите беше најавен за петок, но значајните разлики меѓу Вашингтон и Техеран за долгорочно решение сè уште оставаат простор за можна ескалација на конфликтот.