Се огласи египетска ТВ водителка осудена на смрт поради дрога

Египетската ТВ водителка Сара Калифа е осудена на смрт заедно со уште 11 други откако беше прогласена за виновна во голем случај за трговија со дрога. Кривичниот суд во Каиро ја осуди 39-годишната водителка на смрт со бесење, а нејзиниот адвокат најави жалба на пресудата, објави Unilad.

Според пресудата, групата е казнета и со 500.000 египетски фунти, што е еквивалентно на околу 9.800 американски долари. Обвинителството тврди дека обвинетите дејствувале како организирана криминална група која увезувала суровини за производство на наркотици за понатамошна продажба.

Властите објавија дека повеќе од 750 килограми синтетички дроги и материјали за нивно производство се запленети од станбена зграда што групата наводно ја користела како магацин и лабораторија. Тие беа обвинети и за поседување огнено оружје и муниција без дозвола.

На судењето беа изнесени докази од 20 сведоци и електронски докази, вклучувајќи интервјуа, фотографии и видеа. Обвинителите рекоа дека различни членови на групата биле одговорни за различни фази од операцијата.

Сара Калифа, која има 2,5 милиони следбеници на „Инстаграм“, е најпозната како водителка на криминалното шоу „Невозможна мисија“. Таа е исто така сопственик на клиника за убавина, а претходно водеше и комедија со музичарката Хама Бика. Таа ги негираше обвиненијата во текот на судењето.

На судското рочиште минатиот септември, Калифа негираше каква било вмешаност во дрога.

Според државниот весник „Ахбар ал-Јум“, таа му рекла на судијата дека никогаш не видела дрога сè додека не била фотографирана со неа во канцелариите на египетската агенција за контрола на наркотици.

Во видеата што се појавија на социјалните мрежи, може да се слушне како од судот бара „милост и човечност“. „Си-ен-ен“ ја пренесува нејзината изјава. „Никогаш во животот не сум запалила цигара. Се колнам во Семоќниот Бог, со најсвечена заклетва, дека ми е нанесена неправда“, рекла таа. Автентичноста на снимките не е независно потврдена.

Пресудата првпат беше објавена минатиот месец и беше официјално потврдена дури откако египетскиот Голем муфтија го даде своето религиозно мислење, задолжителен чекор во случаите на смртна казна. Девет други обвинети беа осудени на доживотен затвор во истиот судски процес, додека седум беа ослободени.

Случајот доаѓа во време кога меѓународната заедница внимателно ја следи употребата на смртната казна во Египет. „Амнести Интернешнл“ евидентираше дека египетските судови изрекле 492 смртни казни во 2025 година, а извршени се 23 егзекуции.

Во својот извештај за 2025 година, „Амнести“ изрази загриженост во врска со смртната казна за кривични дела освен намерно убиство, истакнувајќи дека меѓународното право ја ограничува употребата на смртната казна на најтешките кривични дела.