САД го продолжија рокот: „ЛУКОИЛ“ доби уште 45 дена за продажба на странскиот имот

Американското Министерство за финансии го продолжи рокот за рускиот нафтен гигант „ЛУКОИЛ“ за продажба на својот меѓународен имот, овозможувајќи му на менаџментот да ги продолжи преговорите до 28 февруари 2026 година.

Одлуката ја донесе Канцеларијата за контрола на странски имот (OFAC), откако претходниот рок, кој истекуваше на 17 јануари, беше оценет како недоволен за финализирање на комплексните трансакции. „ЛУКОИЛ“ се наоѓа под силен притисок од санкциите воведени од администрацијата на Доналд Трамп, чија цел е да ги пресечат приходите на Москва.

Аналитичарите наведуваат дека продолжувањето овозможува компанијата да склучува договори со заинтересирани купувачи кои не се под санкции, но секоја финална трансакција мора да добие експлицитно одобрување од Вашингтон.

Меѓународниот имот на „ЛУКОИЛ“ вклучува рафинерии во Бугарија и Романија, како и мрежи на бензински станици низ Европа, вклучително и Македонија, а неговата вредност се проценува на над 22 милијарди долари.

Со продолжувањето на лиценцата, компанијата добива дополнителен рок за завршување на преговорите и обезбедување на меѓународни инвестиции, со цел минимизирање на ефектите од санкциите врз нејзиниот глобален бизнис.