Европската конфедерација на синдикати застана зад барањата на ССМ за повисоки плати

Сојузот на синдикати доби поддршка од Европската конфедерација на синдикати во заложбите за зголемување на минималната плата и сите останати плати.

Во писмото упатено до претседателот на ССМ, Слободан Трендафилов, се вели дека напорите и заложбите на ССМ за одбрана на работничките права, промовирање на фер минимални плати, обезбедување соодветно зголемување на платите и зајакнување на колективното договарање се целосно легитимни и се од големо значење.

– Тие ги одразуваат реалните потреби на работниците кои се соочуваат со зголемување на трошоците на живот и зголемена економска несигурност. Вашето залагање за пристојни услови за живот и работа е во срцевината на синдикалното дејствување и е цврсто засновано на меѓународните и Европските стандарди на трудот, се вели во писмото.

Од Европската конфедерација на синдикати велат дека се особено загрижени за, како што наведуваат, пријавите и извештаите за лично целење и заплашување врз претставниците на синдикатот.

– Особено сме загрижени од пријавите и од извештаите за лично целење и заплашување што несомнено има за цел да се влијае врз претставниците на синдикатите и врз нивните семејства. Ваквите дејства се апсолутно неприфатливи и некомпатибилни со демократските принципи. Слободата на здружување, колективното договарање и правото на преземање синдикална акција, активности и чекори, вклучително и штрајк, се фундаментални права заштитени со Конвенциите на МОТ и Европските инструменти за човекови права. Овие права мора да се почитуваат и во Законите и во практиката. Европската конфедерација на синдикати (ETUC) цврсто стои на ваша страна. Ќе продолжиме внимателно да ја следиме ситуацијата и каде што е потребно да изразуваме загриженост на Европско ниво, стои во писмото од Европската конфедерација на синдикати.