Коалициската влада на Романија одобри декрет со кој може да преземе локални средства на компании под меѓународни санкции, како што е рускиот Лукоил, објави Ројтерс.
Лукоил во Романија, според Ројтерс, има 320 бензински пумпи, управува со третата најголема рафинерија во земјата и има права за истражување на отворено море во дел од Црното Море.
Рафинеријата, која снабдува околу една четвртина од горивото на Романија, е затворена со недели поради одржување, се вели во текстот. Официјалните лица изјавија дека земјата-членка на Европската Унија има доволно резерви за да избегне скок на цените што би можело дополнително да ја влоши инфлацијата, која во моментов е највисока во ЕУ.
Според декретот, владата може да назначи специјални администратори на компаниите ако санкциите ги нарушат економските сектори, предизвикаат зголемување на цените или ја загрозат енергетската безбедност. Потребно е претходно одобрение од Врховниот совет за одбрана на Романија, објави медиумот.
Мерката е наводно слична на законот што го донесе соседна Бугарија минатиот месец за преземање на рафинеријата Нефтохим на Лукоил, иако сè уште не е јасно дали Романија ќе ги искористи новите овластувања, објави Ројтерс. Премиерот Илиже Болојан рече дека кабинетот ќе одлучи во декември дали да ги преземе локалните бензински пумпи на Лукоил.
Во ноември, министерот за енергетика Богдан Иван рече дека три компании преговараат директно со Лукоил за купување на неговите романски средства. Уредбата, исто така, ѝ дозволува на Романија да ги преземе правата за истражување на Лукоил во дел од Црното Море. Лиценцата за истражување на Лукоил истекува во првата половина од 2026 година. Два извори во Министерството за енергетика изјавија за Ројтерс дека првичните резултати од дупчењето не укажуваат на значајни наоди на гас.
