Римското обвинителство отвора истрага за контактите на Епстин во Италија

Во документите се споменуваат и контакти со истакнати личности од Римските обвинители отворија истрага против непознати лица под сомнение за трговија со луѓе и сексуално насилство врз малолетници во таканаречените „досиеја Епстин“, објавија денес италијанските медиуми.

Истрагата е покрената по жалба поднесена кон крајот на март од здружението „Differenza Donna“, кое анализираше обемна документација објавена во Соединетите Држави за американскиот финансиер Џефри Епстин, кој беше во центарот на скандал поврзан со сексуална експлоатација на малолетници и кој почина во затвор во 2019 година.

Прегледаните документи наводно ја споменуваат Италија во значителна мера, објави RAI News.

Островот Капри се споменува повеќе од 250 пати, заедно со бројни референци за престој и патувања во други важни туристички и политички центри во Италија, вклучувајќи ги Рим, Милано, брегот Амалфи и Коста Смералда на Сардинија, објавува „Танјуг“.

Во документите се наведени и контакти со истакнати личности од италијанскиот економски, деловен и политички живот.

Целта на римските истражители е да утврдат степенот на можна вмешаност на овие лица и да потврдат дали престојот и контактите на Епстин во Италија биле резултат на мрежа за регрутирање или сексуална експлоатација на млади жени и малолетници.

Како дел од истрагата, римските обвинители испратија писмо со барање за меѓународна правна помош до Министерството за правда на САД, барајќи пристап до документи и архивски материјали кои сè уште се класифицирани како државни тајни.

Со тоа, Италија им се придружува на другите европски земји кои веќе започнаа независни прекугранични истраги.

Исходот од истрагата на римското обвинителство, како и можноста за утврдување на можна кривична одговорност, ќе зависи од одговорот на Вашингтон на барањата на италијанското судство.