Прв случај на инфекција со вирусот Шамонда кај луѓе – почина пациент во Франција

Вирус што првенствено ги напаѓа говедата е првпат регистриран кај човек, а се претпоставува дека до инфекцијата дошло преку каснување од ситна мушичка во источна Франција.

Во Франција е потврден првиот случај на инфекција кај човек со вирусот Шамонда – патоген што претходно беше идентификуван речиси исклучиво кај животни. Француските здравствени власти соопштија дека пациентот кај кого бил откриен вирусот починал на почетокот на октомври, при што напоменаа дека во моментов нема утврден ризик за пошироката јавност.

Вирусот Шамонда припаѓа на родот Orthobunyavirus и се пренесува преку ситни мушички што се хранат со крв. Тој првенствено ги зафаќа домашните животни, особено говедата, иако повремено е откриван и кај други животни.

За првпат е идентификуван во Нигерија во средината на 1960-тите години, а оттогаш спорадично се појавува кај животни во различни делови на Африка и во Јапонија. Во 2026 година, вирусот беше откриен и на фарми во неколку европски земји.

Француските власти наведуваат дека, досега, се сметало оти вирусот не може да се пренесе на луѓе. Првичните проценки укажуваат на тоа дека пациентот се заразил во источна Франција, каде што вирусот циркулирал меѓу животните во текот на пролетта и летото оваа година.

Се претпоставува дека инфекцијата настанала по каснување од мушичка од родот Culicoides. Пациентот имал сериозна претходна здравствена состојба и бил со значително ослабен имунитет; тој починал на почетокот на октомври. Во тек е истрага за да се утврдат околностите на инфекцијата и улогата на вирусот во фаталниот исход.

Француските здравствени власти наведуваат дека, врз основа на моментално достапните информации, не е утврден никаков ризик за пошироката јавност. Во тек се клинички, лабораториски и епидемиолошки испитувања.