Повикува на брза акција: ЕУ треба да се прошири на 40 членки, смета финскиот претседател

Финскиот претседател Александар Стуб предложи прилично амбициозна идеја за идното проширување на Европската Унија, велејќи дека блокот од 27 члена мора да „размислува надвор од рамката“ и да го искористи сегашниот геополитички момент за да го зајакне своето глобално влијание.

Неговите пораки доаѓаат во време на зголемени тензии, во кои политиките на администрацијата на Доналд Трамп, во комбинација со војната во Русија и Украина, ги поттикнуваат некои земји да ги преиспитаат придобивките и недостатоците од членството во ЕУ, пренесува CNBC.

Зборувајќи на енергетска конференција во Хелсинки, Стуб рече дека Унијата би можела да се прошири на дури 40 члена на долг рок, наведувајќи земји како што се Обединетото Кралство, Канада, Турција, Норвешка и Исланд како можни кандидати.

На Самитот за електрична енергија на Европа, тој оцени дека „прозорецот на можности“ за такво проширување е со ограничено времетраење, објаснувајќи дека, според него, по завршувањето на војната во Украина и евентуалните политички промени во САД, фокусот на Европа би можел да се врати на внатрешните несогласувања. Како што рече, тогаш „луѓето би го тргнале стапалото од гаста и повторно би почнале да се занимаваат со помалку важни работи“.

Тој додаде дека „стратешката автономија или геополитичката моќ на Европа често се базира на големината и досегот“, нагласувајќи дека политиката на проширување е „најдобрата европска политика во историјата“.

– Во овој момент, мора да размислуваме широко и географски, мора да се прошириме или барем да создадеме форми на членство кои се доволно флексибилни за да опфатат вкупно 40 европски држави или дури и неевропски – рече Стуб.

Европската комисија не даде веднаш коментар за ова прашање. ЕУ веќе го доживува своето најголемо проширување во една генерација, со девет кандидати кои бараат членство во наредните години.