Потрес во врвот на украинската војска: Зеленски го разреши командантот

Украинскиот претседател Володимир Зеленски го разреши Врховниот командант на вооружените сили на Украина, Олександр Сирски, објавија украинските медиуми.

Отстранувањето доаѓа по неколкудневните масовни протести во Киев и други делови од земјата, за време на кои граѓаните бараа разрешување на Сирски. Незадоволството од него се зголеми уште повеќе откако Зеленски го разреши популарниот реформист Михајло Федоров од позицијата министер за одбрана минатата недела.

Федоров изјави еден ден по разрешувањето дека Сирски му дал ултиматум на Зеленски, што дополнително ги продлабочи тензиите во военото и политичкото раководство на Украина.

Протестите траат од четврток, а еден од организаторите, воениот ветеран Дмитро Козјатински, за Kyiv Independent изјави дека движењето има две барања – враќање на Федоров на функцијата министер за одбрана и отстранување на Сирски од функцијата врховен командант.

Тензии меѓу Сирски и Федоров постојат уште од назначувањето на Федоров и се одразуваат во различни ставови за тоа како да се управува со армијата.

Сирски се залагаше за централизиран команден систем, додека војниците и воените аналитичари го критикуваа за премногу мешање во оперативните одлуки и задржување на елементи од советскиот команден модел.

Најновите одлуки на Зеленски предизвикаа критики од пратениците, воените ветерани и дел од јавноста, кои предупредуваат дека промените во Министерството за одбрана и военото раководство би можеле да ги загрозат претходните реформи и дополнително да ги продлабочат проблемите во украинскиот одбранбен систем.