Поскок каснал четиригодишно момче во камп на Јадранот

За само една секунда, безгрижниот ден на плажа се претвори во кошмар за секој родител. Четиригодишно момче од Австрија било каснато од поскок во петокот во камп во Истра, по што било пренесено во болница во Риека и сместено на одделението за детска интензивна нега.

Момчето било на летување во Хрватска со своето семејство, а според пишувањата на австриските медиуми, до инцидентот дошло додека си играло во природа. Детето поместило помал камен, најверојатно изненадувајќи ја змијата што се наоѓала под него, по што поскокот го каснал.

На детето веднаш му била пружена медицинска помош, по што било пренесено во болницата во Риека. Лекарите му дале противотров, а според информациите потврдени од семејството, момчето е стабилно и добро реагирало на лекувањето.

„Она што го користевме врз него беше антитоксин за отровни змии. Беше применет во нашата единица за интензивна нега за деца, детска клиника. И досега, сè е во ред, сè е во ред“, рече Марко Радман, детски хирург во КБЦ Риека.

Навремената реакција му го спаси животот на малиот Австриец.

Наводно станува збор за помлад примерок на поскок. Каснувањето од оваа змија може да биде особено опасно за малите деца поради нивната помала телесна тежина, што може да доведе до посилен ефект на отровот.

Поскокот е една од најотровните змии во Европа, а карактеристичен е по малиот рог на врвот од муцката. Момчето останува под лекарски надзор и во стабилна состојба.

Медиумите пишуваат дека во Хрватска оваа година до почетокот на јули се регистрирани 14 каснувања. За споредба – во текот на 2024 година, службата за итна медицинска помош регистрирала 52 такви интервенции, а минатата година – 27.