Поранешниот фудбалер на Реал Мадрид и репрезентативец на Холандија доживеа мозочен удар

Поранешниот играч на Реал Мадрид и Евертон, Ројстон Дренте (38), беше хоспитализиран во петокот откако ненадејно падна и доживеа мозочен удар. Неговиот тим и роднини велат дека тој бил итно префрлен во болница и е под стручна грижа и во добри раце.

Иако деталите за неговата медицинска состојба сè уште не се објавени, лекарите се оптимисти и се надеваат на „непречено закрепнување“.

Дренте ја започна својата фудбалска кариера во родниот Ротердам, каде што го покажа својот потенцијал во младинскиот систем на Феенорд на млада возраст.

Во 2007 година, тој го привлече вниманието на големите клубови и потпиша за Реал Мадрид, во трансфер проценет на околу 13-14 милиони евра.

Помина неколку години во дресот на „Кралскиот клуб“, освојувајќи ја Ла Лига во сезоната 2007-08. Во сезоната 2011-12, Дренте играше во англиската Премиер лига како позајмен во Евертон, но неговата кариера оттогаш го однесе низ различни клубови. Од Русија до Турција и Обединетите Арапски Емирати, а потоа назад во холандскиот и шпанскиот фудбал.

Семејството на Дренте моли за приватност во овој тежок период, за да можат да му го обезбедат мирот и поддршката што му се потребни за да се опорави. Навивачите, колегите фудбалери и пошироката заедница изразија загриженост и бројни пораки за поддршка.