Еден од најдобрите играчи од средниот ред на денешницата, Деклан Рајс, е на удар на жестоки критики од легендарниот Греам Сунес, кој верува дека ѕвездата на Арсенал не е ни блиску до нивото на кое многумина го гледаат.
Рајс е еден од најважните играчи за Арсенал и репрезентацијата на Англија во последните години, а зад себе има сезона во која беше меѓу клучните играчи на патот до титулата во Премиер лигата. Сепак, Сунес верува дека Англичанецот е сериозно преценет.
Поранешниот капитен на Ливерпул беше гостин во емисијата „Football Uncensored“ на Пирс Морган, каде без двоумење зборуваше за играчот од средниот ред на „топџиите“.
Сунес нагласи дека никогаш не го разбрал огромниот ентузијазам за Рајс и дека не го гледа како играч кој може да доминира во најголемите европски тимови.
„Не сум сигурен дека Деклан Рајс би играл во Баерн. Не сум сигурен дека би играл во Барселона, Реал (М) или Манчестер Сити. Тој не е врвен играч од средниот ред. Мислам дека е ограничен играч. Секогаш прави безбедни додавања и ретко презема ризици кога топката е во неговите нозе.“
Сунес верува дека Рајс всушност игра на погрешна позиција и дека неговите најдобри квалитети не се поврзани со организацијата на играта.
„Понекогаш чувствувам дека е повеќе централен бек отколку играч од средниот ред. Тој толку често се вклопува меѓу дефанзивците што се прашувам дали тоа е неговата природна позиција. Не мислам дека ќе стане подобар отколку што е сега. Тоа е неговиот плафон“, додаде Сунес.
Водителот на ток-шоуто и познат навивач на Арсенал, Пирс Морган, не се согласи со анализата на Сунес.
Морган го нарече Рајс „играч од светска класа“ и потсети дека тој бил еден од главните придонесувачи за шампионската сезона на Арсенал, како и за одличните настапи на Англија на Светското првенство.
