Милијардерот Илон Маск наводно имал физичка пресметка со американскиот министер за финансии Скот Бесент во април.
Според „Вашингтон пост“, по средбата меѓу двајцата и американскиот претседател Доналд Трамп во Овалната соба во средината на април, за да се разговара за тоа кој треба да биде шеф на Службата за внатрешни приходи (ИРС), во ходникот избила расправија. Маск и Бесент се навредувале еден со друг.
Поранешниот советник на Трамп, Стив Банон, рече дека Бесент го нарекол Маск измамник затоа што не ги исполнил ветените буџетски заштеди.
Инаку Маск тврдеше дека во својство на шеф на Одделот за владина ефикасност (DOGE) ќе ги намали расходите за два трилиони долари.
Банон тврди дека Маск го удрил своето рамо во Бесент „како рагбист“, по што Бесент му возвратил и го удрил. Тој додаде дека на крајот други морале да ги разделат.
„Претседателот Трамп слушна за тоа и рече: „Ова е премногу“, рече Банон, истакнувајќи дека конфликтот доведе до заминување на Маск од Белата куќа на крајот на мај.
Иако на почетокот се чинеше дека најбогатиот човек на светот и по заминувањето од администрацијата ќе остане во добри односи со американскиот претседател, тоа многу брзо се промени. Така Маск почна да го критикува законот за потрошувачка, тврдејќи дека тоа ќе резултира со зголемување на националниот долг.
Во последните денови ескалираше кавгата меѓу двајцата најмоќни луѓе во светот.
Неуспешна „броманса“: Маск против Трамп – тоа се претвори во личен конфликт
