Поради тешка повреда, олимпиец стана параолимпиец, па освои злато!

Поранешниот италијански олимпиец Емануел Ператонер (39) постигна неверојатен подвиг, освојувајќи го златниот медал во сноубординг на Параолимписките игри во Кортина и Милано.

Ператонер, кој ја претставуваше Италија на Зимските олимписки игри во Сочи и во Пјонгчанг, со тоа ѝ се придружи на ретката група спортисти што се има натпреварувано и на Олимписките и на Параолимписките игри.

Италијанскиот сноубордер се натпреваруваше на Зимските олимписки игри во Сочи во 2014 година и на Зимските олимписки игри во Пјонгчанг во 2018 година, а една година подоцна, освои бронза на Светското првенство во Јута. Сепак, неговиот сон за трет настап на Олимписките игри беше нагло прекинат во 2021 година, поради сериозната повреда при тренинг. Тој претрпи фрактури на левата нога, за кои беше потребна целосна замена на коленото. Долго време изгледаше невозможно да се врати во спортот, помина 18 месеци на патерици и единствена цел му беше повторно да оди.

Иако мислеше дека никогаш нема да се врати на патеките, на крајот од 2022 година го откри параолимпискиот свет.

• Знаев нешто за параолимпискиот свет, но дури кога влегов во него, сфатив колку е конкурентен. Немав поим – изјави тој за „Газета дело спорт“.

Тој брзо стана ѕвезда, освојувајќи три титули светски шампиони и 31 победа на Светскиот куп во сите категории.

• Мора да се обидете да бидете позитивни, да пронајдете нови работи и да не се грижите за лошите работи што би можеле да се случат – рече тој во едно интервју.

Најголемиот дел од неговата нова кариера беше на домашен терен, во Кортина, каде што освои параолимписко злато во дисциплината сноуборд крос.

• Освојувањето на овој медал е неверојатно, тоа е најемотивниот момент во мојата кариера. Среќен сум што го донесов златото во мојата татковина, и тоа толку блиску до мојот роден град – рече 39-годишниот Италијанец, кој е роден во Болцано.

Потоа беше прашан за разликата меѓу спортистите со и без попреченост.

• Општо земено, нема разлика во спортот. Спортистите се тие што мора да се приспособат на својата попреченост, но на крајот на денот, сепак, тоа е  сноубординг – заврши Ператонер.