Половична радост за Американците: Фис и Гоф блеснаа во Синсинати!

Артур Фис и Коко Гоф се победници на Мастерс турнирот во Синсинати, откако двајцата беа најдобри во финалните пресметки во машка и женска конкуренција.

Францускиот тенисер го освои првиот Мастерс во кариерата, совладувајќи го Американецот Франсес Тиафо со 2-1, по сетови 6:3, 1:6, 6:0.

Фис одлично го отвори мечот и веднаш направи брејк, кој успеа да го задржи до крајот на првиот сет. Тиафо, сепак, возврати во вториот сет и со два брејка стигна до убедливи 6:1. Во решавачкиот сет следуваше целосен распад во играта на Американецот. Фис направи три брејка и без загубен гем стигна до 6:0 и најголемиот трофеј во досегашната кариера.

Французинот имаше 14 винери повеќе од Тиафо и седум аса повеќе, а важен фактор беше и првиот сервис – Фис имаше 60 проценти успешност, наспроти само 40 проценти кај Американецот.

Дваесет и двегодишниот Фис, кој работи со легендарниот Хрвар Горан Иванишевиќ, стигна до својата петта титула на АТП турнејата, но прва од категоријата Мастерс 1000.

На патот до трофејот оваа сезона претходно играше полуфиналиња во Мајами и Мадрид, четвртфиналиња во Индијан Велс и Канада, а сега направи голем чекор напред со триумфот во Синсинати.

Во женска конкуренција, Коко Гоф ја совлада сонародничката Џесика Пегула со убедливи 6:2, 6:4 и по вторпат во кариерата го освои турнирот во Синсинати.

За Гоф ова беше прв трофеј во сезоната, а со него се приклучи на Серена Вилијамс и Викторија Азаренка како тенисерки со најмалку две титули во Синсинати.

Финалето беше историско бидејќи за првпат од 1970 година во Синсинати се сретнаа две Американки во мечот за титулата.

Гоф одигра одличен турнир, откако по загубениот прв сет против Људмила Самсонова, во следните мечеви загуби само 32 гема.

Во финалето, Американката фуриозно стартуваше и поведе со 5:0 за помалку од половина час, а иако Пегула успеа да се врати во вториот сет, Гоф без поголеми проблеми го затвори мечот.

Така, Синсинати доби нови шампиони во двете конкуренции – Фис првпат го освои Мастерсот, додека Гоф ја потврди својата доминација во Охајо.