По примирјето околу 40.000 раселени Либанци се вратиле во јужен Либан

Околу 400.000 Либанци раселени од војната се вратија во јужен Либан, а следната недела се очекуваат повеќе повратници охрабрени од затишјето во четиримесечниот конфликт меѓу Израел и Хезболах. Но, многумина не беа во можност да се вратат, изјави министерката за социјална помош на Либан, Ханине ел Сајед.

Од март наваму, околу еден милион луѓе беа принудени да ги напуштат своите домови, додека голем број од нив сè уште се во засолништа или привремено сместување бидејќи нивните домови се уништени или непогодни за живеење, изјави таа. Околу 40 проценти од раселените се вратија во своите градови и села, па бројот на луѓе во заедничките засолништа значително се намали, од 37.000 на околу 13.000.

Некои засолништа ќе останат отворени за семејствата што не може да се вратат, а хуманитарните програми, вклучувајќи ја и вонредната парична поддршка, ќе продолжат. Бројот на засолништа се намали од 692 на врвот од кризата на 479, додека се отворија дополнителни центри во Набатија, за оние што сакаат да останат блиску до своите домови. Ел Сајед рече дека бројките што се шират го маскираат јазот помеѓу оние што можеле да се вратат и оние што сè уште се раселени.

– Ова се семејства што би можеле да се вратат на нешто, барем на основниот минимум – изјави таа за „Ројтерс“, додавајќи дека фактот што не се вратиле другите значи дека се во многу потешка ситуација.