Писториус: На Германија ќе ѝ бидат потребни до 60.000 дополнителни војници

На Германија ќе ѝ бидат потребни до 60.000 дополнителни војници како дел од новите цели на НАТО за зајакнување на нејзината војска и вооружување, изјави денес министерот за одбрана на земјата, Борис Писториус.

„Ние ја преземаме одговорноста како најсилна европска економија“, изјави тој за новинарите пред состанокот на министрите за одбрана на НАТО во Брисел, објави „Ројтерс“.

Според Писториус, на германските вооружени сили ќе им бидат потребни околу 50.000 до 60.000 дополнителни војници во сите гранки на војската, со што вкупниот број на германски војници ќе достигне помеѓу 250.000 и 260.000.

Писториус истакна дека прашањето е дали доброволното запишување што Берлин има намера да го воведе ќе биде доволно за да се пополнат редовите на војската.

Во исто време, тој рече дека војската во моментов не е во можност да прифати голем број регрути поради недостаток на касарни и инструктори и дека сè додека не се создадат потребните капацитети, ќе се воведе доброволно запишување.

Германската војска сè уште не ја достигнала својата цел за 2018 година од 203.000 војници и ѝ недостасуваат околу 20.000.

Според претходните информации, НАТО ќе побара од Германија да обезбеди уште седум бригади, или околу 40.000 војници.

Најновите барања што ги постави НАТО се во согласност со одбранбените планови наведени на илјадници страници тајни документи, кои беа составени за прв пат од крајот на Студената војна и детално опишуваат како сојузничките сили би реагирале во случај на руски напад врз Алијансата.

НАТО заклучи дека постојат сериозни недостатоци во некои области, почнувајќи од големи формации на борбено подготвени копнени трупи до оружје со долг дострел, доволно залихи на муниција и безбедни комуникации, пренесува Танјуг.