Перински: Прашајте го Димитар Ковачевски зошто на владината седница ја повлекол одлуката за менување на бројот на општинските советници?

Прашајте го поранешниот премиер Димитар Ковачевски зошто од една седница на тогашната Владат во 2023 година била тргната веќе подготвената одлука за менување на бројот на советниците по општините, согласно на пописот на населението од 2021 година, изјави денеска Златко Перински, министер за локална самоуправа.

На прес-конференцијата во Владата тој одговори на новинарско прашање кое се однесуваше за барањата на опозициската ДУИ за повлекување на владината одлука за намалување на бројот на општински советници во 14 општини и блокадите со Бадентеровото правило на неколку закони во Собранието.

-Има една работа која никој досега не ја спомнал. Иста ваква одлука за намалување на бројот на општински советници требало да ја донесе Владата на Димитар Ковачевски во 2023 година. Треба да го прашате зошто таа точка е тргната од владината седница. Најверојатно одговорот ви е јасен но ова отвора еден прашалник и прашајте го зошто таа одлука тогаш не е донесена. Инаку, јас ја имам како одлука и можам да Ви ја пратам. Таа е изработена и била тргната од седница на Влада. Била идентична со нашата од лани. Бројот на советниците не е креиран врз основа на македонски или албански етнички средини. Во овие 17 општини каде имало корекции има општини каде што доминираат Албанците но и општини каде што доминираат Македонци.

Според него, бројот на новите советници по општините е утврден врз основа на бројот на „резидентно наделение“ кои претставуваат жители на таа општина.

-Во бројот на жителите не се вклучува нерезидентно население. Тоа не се прави никаде во светот – потенцира Перински. (Б.Ѓ.)