Папата Лав XIV остро ги осуди оние што ја ограбуваат Земјата преку војна и експлоатација

Поглаварот на Римокатоличката црква, папата Лав XIV, остро ги осуди „шаката тирани“ кои ја ограбуваат Земјата преку војна и експлоатација денес во молитва во Камерун, епицентарот на една од најзанемарените кризи во светот, објави АП.

Римокатоличкиот водач проповедаше порака за мир во епицентарот на сепаратистичкиот конфликт во централна Африка.

Тој отпатува во западниот камерунски град Баменда, каде што толпите блокираа патишта, свиреа со труби и пееја, воодушевен што папата дојде до нивната оддалеченост за да ги види и да фрли глобална светлина врз насилството што го трауматизира нивниот регион речиси една деценија.

Папата Лав XIV претседаваше со мировен состанок на кој учествуваа поглаварот на племето Манкон, модератор од презвитеријанската црква, муслимански имам и католичка калуѓерка. Целта беше да се демонстрира повеќеверски напор за постигнување мир и обезбедување грижа за многуте жртви на конфликтот.

Тој го поздрави мировното движење и повика религијата да не се вовлекува во конфликти. Тој го покрена прашањето во контекст на војната меѓу САД и Израел против Иран и религиозните оправдувања за тој конфликт што доаѓаат од американските претставници.

„Блажени се миротворците. Но, тешко на оние што манипулираат со религијата и самото име Божјо за своја воена, економска и политичка добивка, туркајќи го во темнина и нечистотија она што е свето“, рече папата.

Римокатоличкиот поглавар повика на „решителна промена на курсот“ подалеку од конфликтот и експлоатацијата на Земјата за воена и економска добивка.

„Овој свет го ограбуваат шака тирани, но сепак го држат заедно мноштво браќа и сестри кои ја покажуваат својата поддршка“, рече папата Лав XIV.

Неговите зборови се однесуваа на сепаратистичкиот конфликт во Камерун, но ватиканските претставници јасно ставија до знаење дека папата ќе проповеда евангелска порака за мир што ги надминува границите и континентите и е упатена до сите оние што се одговорни за војните и ограбувачката експлоатација на Земјата, пренесе „Бета“.