Отказите поради ВИ веќе на прагот – најмногу губење на работни места можат да очекуваат вработените во индустријата

Вештачката интелигенција (ВИ) се користи сè повеќе во германската економија, поради што 27,1 процент од компаниите очекуваат отпуштања во следните пет години, според истражувањето на економскиот институт „Ифо“ (Ifo).

Најмногу отпуштања, 37,3 проценти, се очекуваат во најважниот економски сектор – индустријата, додека во трговијата, речиси 30 проценти од компаниите очекуваат намалување на работните места поради воведувањето на вештачката интелигенција, објавува dpa.

Сепак, две третини од компаниите не предвидуваат промени во бројот на вработени, а малку повеќе од пет проценти изјавиле дека благодарение на вештачката интелигенција дури ќе можат да вработат повеќе луѓе.

Минхенските економисти не очекуваат вештачката интелигенција да има непосредно влијание врз германскиот пазар на трудот во блиска иднина.

„Компаниите моментално испитуваат во кои области вештачката интелигенција може да донесе зголемување на продуктивноста. Ќе поминат уште неколку години пред ова да се претвори во мерливи ефекти врз пазарот на трудот“, рече претседателот на Институтот Ифо, Клеменс.

И покрај тоа што германската економија стагнира три години, многу компании сè уште очајно бараат квалификувани работници.

Се очекува недостатокот на квалификувани работници дополнително да се зголеми во наредните години, бидејќи генерацијата бејби-бумери го напушта пазарот на трудот.

Директорот за истражување на „Ифо“, Клаус Волрабе, го гледа предизвикот во преведувањето на зголемувањето на продуктивноста што произлегува од вештачката интелигенција во благосостојба за многумина без да се предизвикаат нарушувања во некои професии.