Осумнаесетгодишен Украинец е обвинет за саботажа за Русија во Полска

Обвинителите во Полска подигнаа обвинение против 18-годишен Украинец за извршување саботажа во име на руската разузнавачка служба, чија цел наводно била поттикнување тензии меѓу Полска и Украина, пишува „Би-би-си“.

Осомничениот, идентификуван како Иља К. во согласност со полските закони за приватност, е обвинет за 47 кривични дела извршени помеѓу ноември 2024 и август 2025 година, кога бил уапсен, објави „Би-би-си“.

Наводната саботажа вклучувала сквернавење на споменици посветени на полските жртви на Украинската бунтовничка армија (УПА), организација која учествувала во убиството на десетици илјади Полјаци за време на Втората светска војна, познато како Волхински масакр.

„Целта била да се поттикнат етнички тензии меѓу Полска и Украина“, соопшти полската Агенција за внатрешна безбедност (ABW), како што објави „Би-би-си“.

Обвинителите изјавија дека осомничениот дејствувал од финансиски, а не од идеолошки причини, но дека повеќето од наводните активности биле „во корист на странска разузнавачка служба“.

Aгенцијата во мај изјави дека минатата година отворила 48 истраги за шпионажа, повеќе од двојно повеќе од бројот во 2024 година. Агенцијата изјави дека руските тајни служби имале за цел да го оцрнат меѓународниот углед на Полска и да ги искористат „историските етнички конфликти, првенствено во полско-украинските односи“.

Осумнаесетгодишникот е обвинет и за подготовка на напад со беспилотно летало врз возилото на полскиот претседател Карол Навроцки за време на минатогодишната парада по повод Денот на вооружените сили во Варшава на 15 август. Тој беше уапсен три дена пред настанот, соопшти обвинителството.

Доколку биде осуден, осомничениот се соочува со доживотен затвор. Агенцијата тврди дека наводно регрутирал други луѓе да извршуваат кривични дела и им плаќал со криптовалути регистрирани во Русија и Кина.

Според обвинителството, Илија К. добивал задачи од неидентификувано лице преку апликација за пораки, а потоа испраќал фотографии како доказ дека ги извршувал.

Случајот во Полска е дел од поширок тренд на руски хибридни операции во Европа, кои вклучуваат саботажи, кибернапади, ширење дезинформации и обиди за поттикнување социјални поделби. Европските безбедносни служби во последните години предупредуваа за зголемената употреба на „посредници“ – лица регрутирани преку Интернет кои, во замена за пари, извршуваат дејствија како што се палење, вандализам или напади врз инфраструктура.

Германскиот весник „Билд“ објави дека „некогашни“ руски агенти биле уапсени на српско-унгарската граница на почетокот на јуни, планирајќи да постават експлозиви во Германија. Наводно, кај нив биле пронајдени експлозиви.