Осомничениот за планирање терористички напад на концерт на Тејлор Свифт во Виена е осуден на 15 години затвор

Дваесет и едногодишен австриски државјанин е осуден на 15 години затвор за планирање џихадистички напад на концертот на американската пејачка Тејлор Свифт во Виена за време на нејзината турнеја „Ерас“ во август 2024 година, објави „Би-би-си“.

Обвинетиот, идентификуван само како Беран А. во согласност со австриските закони за приватност, призна пред судот дека го планирал нападот, како и други дела поврзани со тероризам, вклучително и напад во Мека.

За време на судењето во австрискиот град Винер Нојштат, Беран А. изрази каење за своите постапки. По неколкучасовно размислување, поротата го прогласи за виновен и го осуди на 15 години затвор.

Беран А. беше уапсен по дојава од американската Централна разузнавачка агенција (ЦИА) кратко пред првиот од трите распродадени концерти на Тејлор Свифт закажани да се одржат на стадионот Ернст Хапел во Виена.

По неговото апсење, сите концерти во Австрија беа веднаш откажани, предизвикувајќи разочарување кај речиси 200.000 обожаватели, како и кај самата пејачка.

Обвинителството тврдеше дека Беран А. се радикализирал и се заколнал на верност на терористичката организација Исламска држава (ИС). Истражителите велат дека тој се обидел нелегално да набави оружје, вклучувајќи автоматска пушка и рачна граната, но не успеал.

Форензичкиот психијатар Питер Хофман изјави за време на судењето дека обвинетиот не покажувал знаци на ментална болест и дека „нема психијатриско објаснување“ за неговата радикализација.

Беран А беше исто така на суд со уште еден 21-годишен обвинет, Словак идентификуван како Арда К, за кого обвинителството тврди дека бил дел од ќелија поврзана со Исламската држава. Сепак, според обвинителството, Арда К не учествувал во планирањето на нападот на концертот на Тејлор Свифт.