Путин во неделата предложи одржување директни преговори со Украина, чија цел е да се постигне траен мир и да се стави крај на војната. Украинскиот претседател Володимир Зеленски ја поздрави иницијативата, велејќи дека Киев е подготвен за разговори, но дека Москва мора прво да се согласи на итен прекин на огнот.
Советникот за надворешна политика на Кремљ, Јуриј Ушаков, изјави за новинарите по изјавата на Путин дека преговорите предложени од Путин ќе го земат предвид нацртот што беше напуштен во 2022 година, како и моменталната ситуација на теренот.
Неколку дена по руската инвазија на Украина во февруари 2022 година, Русија и Украина започнаа преговори во Белорусија. Тие преговори подоцна продолжија во Истанбул.
Нацртот кој е договорен таму, кој ја поставува рамката за можно решавање на конфликтот, е познат како „Истанбулски договор“. Но, преговорите пропаднаа во мај, а руските власти долго време тврдеа дека решението може да се постигне токму по примерот на Договорот од Истанбул.
И Стив Виткоф, специјалниот пратеник на американскиот претседател Доналд Трамп, неодамна се осврна на нацртот од 2022 година како потенцијален водич за постигнување мир во иднина.
Според нацртот, Украина ќе се согласи на постојана неутралност во замена за меѓународни безбедносни гаранции од петте постојани членки на Советот за безбедност на ОН: Велика Британија, Кина, Франција, Русија и САД, како и други земји, вклучувајќи ги Белорусија, Канада, Германија, Израел, Полска и Турција.
Украина, всушност, привремено се согласи на нечленство во НАТО во замена за безбедносни гаранции кои, во случај на руска инвазија, ќе ги обврзат САД и нивните сојузници директно да се вклучат во борбата против Русија.
Прашањето за територијата во нацртот од 2022 година беше секундарно во однос на безбедносните гаранции.
Но, дипломатите од двете страни тоа го сметаа за најголемата пречка за мирот.
Украина, откако беше нападната, сакаше да се гарантира нејзината безбедност, но САД и нивните сојузници беа претпазливи поради потенцијално влегување во војна со Русија.
Според нацртот од 2022 година, патот на Украина до можното членство во Европската унија би бил поедноставен, а Русија се обиде да ја ограничи големината на вооружените сили на Украина, како и да ги укине законите кои Москва ги смета за дискриминаторски кон населението што зборува руски, пренесува Ројтерс.
