Новиот дрес на „Атлетик Билбао“ предизвика политичка контроверзност во Шпанија поради мапата на „Голема Баскија“

Новиот сет дресови на шпанскиот фудбалски клуб „Атлетик Билбао“ за сезоната 2026/27 предизвика политичка контроверзност во Шпанија.

Контроверзноста настана поради деталите на задната страна од дресот, мапа на таканаречената „Еускал Херија“ или „Голема Баскија“, која ја вклучува и територијата на Навара.

Овој потег наиде на остри реакции од политичките партии „Народна партија“ и VOX, кои веруваат дека клубот на овој начин промовира политичка порака и го доведува во прашање идентитетот на Навара, објави шпанскиот весник „Марка“.

Претставниците на Народната партија на Навара изјавија дека е „неприфатливо да се користи фудбалот за прикажување симболи што го поткопуваат идентитетот на Навара“, додека VOX отиде чекор понатаму поврзувајќи го клубот со баскиската сепаратистичка организација ЕТА.

Пораки како што се: „Во Навара ја поддржуваме Осасуна, Навара не е дел од Баскија, а Баскија не постои. Ставете ја вашата мапа, но оставете ја нашата територија на мира“ се појавија и на социјалните мрежи.

Контроверзноста се однесува на концептот „Еускал Херија“, кој во баскискиот националистички наратив вклучува седум територии, три покраини на автономната баскиска заедница во Шпанија (Алава, Бискај и Гипускоа), потоа Навара, како и три области во југозападна Франција: Долна Навара, Лабор и Зубероа.

Иако концептот има културно и историско значење за некои Баскијци, тој нема официјален политички или административен статус, поради што неговото прикажување на спортски симболи често предизвикува политички дебати во Шпанија, пренесе „Бета“.