Нови мерки: Се очекува драстично поевтинување на дизелот

Граѓаните наскоро би можеле да плаќаат значително пониска цена за дизел горивото, откако Владата најави нови мерки кои треба да придонесат за намалување на трошоците за транспорт и заштита на животниот стандард.

Премиерот Христијан Мицкоски соопшти дека врз основа на движењата на светските пазари и актуелните анализи, се очекува дизелот да поевтини за околу шест до шест и пол денари по литар. Според проценките, бензините би можеле да останат на сегашното ниво или да претрпат минимална корекција.

Во текот на викендот Владата ќе одржи онлајн седница на која ќе се разгледуваат најновите пресметки и ефектите од досегашните антикризни мерки во енергетскиот сектор.

Од Владата велат дека падот на цените на светските пазари, комбиниран со задржувањето на дел од поволностите поврзани со акцизите, создава услови за дополнително намалување на цената на дизелот на домашниот пазар.

Во исто време, се водат разговори и со компанијата „Окта“ за можни дополнителни олеснувања во снабдувањето со горива во текот на првата половина од јуни, што би можело дополнително да влијае врз конечната цена.

Мицкоски оцени дека и покрај турбуленциите на меѓународните пазари во изминатите месеци, Македонија успеала да обезбеди стабилно снабдување со горива без прекини и рестрикции. Според него, домашниот пазар останал отпорен и покрај зголемената побарувачка на бензинските станици.

Доколку најавените пресметки се потврдат, Македонија и понатаму ќе остане меѓу земјите со најниски цени на горивата во регионот, а најголем бенефит од новата корекција би имале граѓаните и компаниите кои користат дизел гориво.