Градоначалничката на Општина Кисела Вода, Бети Стаменкоска – Трајкоска и достави едукативни и креативни материјали на градинката „8 Март“ во населбата Расадник, во рамки на работна посета што ја оствари вчера.
–Едукативните и креативните материјали, се од суштинско значење за правилниот интелектуален и моторен развој на најмладите. Наменети се за поддршка на стручниот кадар во реализацијата на секојдневните активности и за целосно искористување на детскиот потенцијал низ процесот на учење преку игра – соопштија од Општина Кисела Вода.
Оттаму додаваат дека вакви материјали се обезбедени и доставени до сите објекти на детските градинки низ Кисела Вода.
Ова е дел од пошироката стратегија на Општина Кисела Вода за сеопфатно унапредување на предучилишното воспитување, што вклучува модернизација на просториите и континуирано вложување во условите за правилен детски раст.
-Вложувањето во раниот детски развој и континуираното унапредување на условите во кои престојуваат најмладите е еден од нашите највисоки приоритети. Преку обезбедувањето на овие едукативни материјали, директно придонесуваме кон поквалитетен образовен процес уште од најрана возраст и создаваме стимулативна средина за згрижување и воспитување на децата – истакна градоначалничката Стаменкоска – Трајкоска.
