Ноќта на вештерките на Американците им преседна, пред да почне! Цените вртоглаво растат, продажбата тоне

Традиционалниот празничен шопинг оваа година се одвива во значително поинаква атмосфера.

Продажбата на слатки за Ноќта на вештерките оваа година започна бавно, бидејќи потрошувачите во Соединетите Држави се соочуваат со високи трошоци за живот и вртоглаво високи цени на чоколадото.

Според податоците на компанијата за истражување на пазарот „NielsenIQ“, продажбата на слатки за Ноќта на вештерките опаднала за 6,7 отсто во периодот што заврши на 17 октомври, во споредба со истиот период минатата година.

Како што пренесува Асошиејтед прес (AP), во средината на септември бил забележан пад на продажбата на слатки од 11,7 отсто, со што се поништени добивките остварени во предсезонскиот период во текот на претходните две години.

Крис Косталџи, потпретседател и експерт за прехранбената индустрија во „NielsenIQ“, изјави дека високите цени на горивото дополнително ја зголемиле загриженоста на Американците за нивната куповна моќ, што ја намалува побарувачката за слатки за Ноќта на вештерките.

Според извештаите, просечната цена на еден галон обичен бензин во САД до петокот достигнала 4,29 долари – што претставува зголемување од речиси 40 отсто во споредба со претходната година.

„Мислам дека се работи за тоа што потрошувачите сега трошат значително повеќе пари на гориво, домување, облека и храна“, рече Косталџи.

Според него, до средината на октомври пораст во продажбата забележале само помалите пакувања слатки, додека најголем пад е регистриран кај големите пакувања.

Веќе неколку години, цените на слатките во САД растат побрзо од стапката на инфлација. Според владините податоци, цените на слатките производи и гумите за џвакање во септември биле за 44 отсто повисоки во споредба со оние пред пет години.

Во истиот период, цените на сите прехранбени производи наменети за консумирање дома се зголемиле за 22,5 отсто.