Четворица морнари беа спасени во јужниот дел на Тихиот Океан откако кит-убавец (спермацет) ја потопи нивната јахта долга 16 метри удирајќи во неа. Екипажот поминал неколку часа на сплав за спасување пред да биде пронајден од еден контејнерски брод.
Џема и Џереми Купер, Тери Хетерингтон и Мартин Жафре пловеле со јахтата „Таи Там“ во оддалечен дел од океанот – на 250 наутички милји од островот Норфолк – кога биле изненадени од силен удар што го навалил пловилото на страна, пренесува „Телеграф“.
Австралијката Џема Купер раскажа дека силината на ударот ја исфрлила од кормилото. Кога погледнала во водата, видела јато китови-убавци. „Погледнавме кон левата страна на бродот и видовме група од шест до осум китови. Тогаш ни стана јасно што се случило“, рече таа. Таа исто така истакна дека животните биле долги колку и самиот брод.
Џереми Купер спиел во внатрешноста на бродот во моментот на ударот, но се разбудил од потресот. „Веднаш беше јасно дека ситуацијата е критична“, изјави тој. „Целиот механизам за управување на десната страна беше уништен, а големо количество вода навлегуваше во бродот.“ По половина час, околу 13:00 часот по новозеландско време, екипажот го активирал сигналот за помош. Додека ги чекале спасувачите, се обидувале да ја исфрлат водата од јахтата. „Испративме повик за итна помош (mayday)“, додаде Тери Хетерингтон од Нов Зеланд.
Додека авионот „P-8A Poseidon“ на новозеландските воздухопловни сили трагал по нив, состојбата на јахтата се влошувала. Мартин Жафре, столар од Франција, открил дека китот го пробил трупот на неколку места и дека фибергласот пукнал. Кормилото исто така било уништено, па управувањето со бродот станува невозможно.
Џафре се обидел да го спречи навлегувањето на водата со полиуретанска пена и други материјали. Тој нурнал за да го прегледа трупот, додека другите рачно ја испумпуваат водата за да спречат поплавување на моторот.
Околу полноќ, тие ја напуштиле јахтата и го спуштиле сплавот за спасување во мирното море, под светлината на полната месечина. Го пресекоа јажето што ги поврзуваше со бродот, стравувајќи дека тој ќе ги повлече со себе додека тоне.
ALERT: Sperm whale pod smashed into the side of a yacht and forced the sailors to abandon ship.
The crew of a 52-foot Tai Tam was sailing in the Pacific Ocean when a rarely seen pod of sperm whales thrashed through its side.
The hit tore a massive hole in the boat’s side, and the crew of 4 was stranded for more than 18 hours.
Jemma Cooper was driving the vessel at the time and said, “There was sort of a loud thud. The whole boat was pushed sideways… We looked out to our port side, and there were six to eight, a pod, of whales there. So then it became clear that that’s what it was.”
The crew was eventually rescued by a 470-foot container ship, the MV Sofrana Surville, and sustained no injuries.
— E X X ➠A L E R T S (@ExxAlerts) October 1, 2026
„Седевме на сплавот и гледавме како бродот тоне на околу стотина метри од нас. Воопшто не беше пријатен момент“, изјави Купер за „Најн њуз“ (Nine News).
По 18 часа неизвесност, тие беа спасени од контејнерскиот брод „МВ Софрана Сурвил“ (MV Sofrana Surville), долг 143 метри, кој стигна до нив следното утро во 6 часот. Екипажот се качи на бродот преку скала, испи кафе и разговараше со капетанот, рече Купер.
Воени снимки од Нов Зеланд ги забележаа моментите на спасувањето – од мавањето со рака од јахтата додека таа сè уште плуташе, па сè до нејзиното тонење, кога прамецот исчезна под површината. И покрај сè, Купер заврши со позитивна нота: „Тоа беше прекрасно искуство со ужасен крај, но за среќа, никој не настрада“.
