Нема ново излевање на реките, водата од поплавените подрачја се повлекува, но штетите остануваат

Врнежите од дожд и од снег во одредени подрачја од државата сè уште предизвикуваат проблем, иако, според Центарот за управување со кризи, водостојот на реките се стабилизира, а водата од поплавените подрачја се повлекува.

Според информациите од Центарот за управување со кризи (ЦУК), на подрачјето на Скопје не било евидентирано нарушување на редовната состојба.

И во Тетово и околината состојбата била стабилна, без нарушување на редовното функционирање.

– Сите патни правци се проодни, а коловозите се претежно влажни. ЈП „Македонија пат“ редовно го одржува патниот правец Тетово – Попова Шапка. Во врска со појавениот одрон на патниот правец Гостивар – Маврово, кај каменоломот, надлежните служби се известени и најавено е ангажирање екипа за расчистување и нормализирање на сообраќајот – информираат од ЦУК.

На територијата на Струмица немало пријави за настанати штети, не постоела опасност од излевање на реките и не биле евидентирани одрони или непроодни патни правци.

Според информациите на ЦУК, и на подрачјето на Велес состојбата била стабилна. Немало излевање на реките и на територијата на општините Куманово, Липково и Старо Нагоричане, а водостојот бил во опаѓање.

– Сите патни правци се проодни и чисти. Патниот правец од селото Пелинце до граничниот премин Пелинце беше подмрзнат, но по интервенција од ЈП „Македонија пат“, тој е целосно расчистен. Во Крива Паланка, Кратово и во Страцин, сите главни патни правци се проодни, со тековни интервенции за расчистување на одроните и на снегот на одредени локални делници – нагласуваат од ЦУК.

Стабилна била состојбата и во Штипски Регион.

Со изградба на заштитен насип, била ставена под контрола и реката Сушица во Охрид.

– Сепак, на повеќе локации сè уште има поплавени подрумски простории и дворови – велат од ЦУК.

Оттаму додаваат дека во Струшко, во селата Мислешево и Калишта, има поплавени дворови и дека надлежните служби ја следат состојбата.

Според  ЦУК, реката Радика во Дебар имала зголемен водостој, но без опасност од излевање.

– Патните правци се проодни, со појава на помали одрони, кои редовно се расчистуваат – уверуваат од ЦУК.

Намален бил водостојот на Зајашка Река и на реката Треска во Кичево и нема опасност од нови поплави.

– Во тек е состанок на општинскиот кризен штаб за натамошни активности – истакнуваат од ЦУК.

Оттаму додаваат дека во Демир Хисар, поради оштетување на мост на Боишка Река, локалниот пат за селата Мренога бил затворен за сообраќај.

– Реките се вратени во коритата, освен реката Црна во атарот на селата Жван и Единаковци, каде што сè уште има излевање и поплавени земјоделски површини – велат од ЦУК.

И во Битола била нормализирана состојбата и водата постепено се повлекувала од зафатените површини.

– Нивото на реката Црна кај Новаци изнесува 320 сантиметри – децидни се од ЦУК.

Се повлекувала водата и од поплавените земјоделски површини во  Ресен и биле во тек интервенции за расчистување на коритото на Голема Река.

Според прогнозата на Управата за хидрометеоролошки работи, ќе следува период на стабилно и суво време со студени утра и утрински температури, кои насекаде ќе бидат под нулата. Утре  и во вторник, наместа дневните температури ќе бидат под нулата, а од среда ќе бидат во постепен пораст. Од средината на седмицата, во котлините ќе има услови за појава на магла.

(А. П.)