„Не патувајте во Франција ако не морате“

Неколку европски и азиски земји ги предупредија своите граѓани кои моментално се наоѓаат во Франција, или планираат да патуваат таму, да бидат претпазливи поради можноста од нови немири и насилни демонстрации; исто така, им препорачаа да ги избегнуваат протестните собири и да ги следат упатствата на локалните власти.

Според „Франс 24“ (France 24), германското Министерство за надворешни работи предупреди дека во наредните денови не може да се исклучи можноста за нови немири и ги повика германските граѓани да постапуваат според упатствата на полицијата.

Италија ги повика своите граѓани да го регистрираат својот престој во Франција преку веб-страница или апликација за полесно да ги лоцираат во случај на потреба, додека Чешка им препорача на своите граѓани да избегнуваат демонстрации, протестни маршеви и јавни собири.Чешкото Министерство за надворешни работи оцени дека безбедносната ситуација во Франција се влошила.

Слични предупредувања издадоа и Полска и Холандија, кои им советуваа на патниците да ги избегнуваат протестните области.
Данска, Шведска, Финска и Норвешка, исто така, ги повикаа своите граѓани да избегнуваат демонстрации и да ги следат упатствата на локалните власти.

Кинеското МНР и неговите дипломатски мисии во Франција ги повикаа кинеските граѓани да бидат внимателни, да преземат дополнителни безбедносни мерки и да ги избегнуваат протестните области, објавија кинеските државни медиуми.
Министерството за надворешни работи на Малезија соопшти дека ја следи ситуацијата и дека патувањето во Франција не е ограничено, но им советуваше на граѓаните да размислат за одложување на непотребните патувања додека не се подобри ситуацијата. Амбасадата на Малезија во Париз ги повика своите граѓани кои веќе се во Франција да бидат внимателни.

Бранот масовни протести во Франција почна кон средината на септември како локален штрајк и бунт на ученици и наставници во средно училиште во сиромашно предградие на Париз, предизвикан од лошите услови за образование, хроничниот недостиг на наставници, преполните училници и дотраените училишни згради.
Протестите се проширија во средните училишта и факултети низ целата земја и беа придружени со масовни блокади и судири со полицијата.
На демонстрациите им се придружија синдикати, родители и активисти од поранешното движење „Жолти елеци“, а на почетните барања за реформа на образованието им се придружија масовни улични протести против високите трошоци за живот, зголемувањето на цените на горивата и владините мерки за штедење.