Најплатениот премиер во светот добива покачување, зема повеќе од Трамп и Мерц

Премиерот на Сингапур, Лоренс Вонг, кој е најплатениот шеф на влада во светот со основна плата од околу 1,5 милиони евра годишно, наскоро ќе добие покачување, заедно со министрите, преку најавеното прво зголемување на платите во последните 15 години, пренесува АП.

Министрите во градот-држава Сингапур во иднина ќе добиваат повисоки основни плати, до 1,8 милиони сингапурски долари (1,22 милиони евра), наместо досегашните 1,1 милион сингапурски долари (приближно 748.000 евра).

Платата на премиерот во рамките на покачувањето ќе се зголеми од 2,2 милиони на дури 3,6 милиони сингапурски долари (2,47 милиони евра).

Вонг изјави дека постои оправдување за зголемувањето на платите, бидејќи политиката ќе стане непривлечна за врвните таленти доколку платите не се зголемат.

Платите на високите политички функционери во Сингапур се засноваат на медијанскиот годишен приход на 1.000 луѓе со највисоки приходи во земјата, а потоа се одбива попуст од 40 проценти за да се земе предвид посебниот карактер на политичката функција.

Според владата, министерските плати заостанувале зад платите во приватниот сектор.

„Доброто управување не беше нешто што се подразбира во Сингапур. Тоа свесно се градеше во текот на многу години“, рече Вонг, кој додаде дека новата структура на плати и дава на владата „подобра шанса да ги убеди способните Сингапурци да се вклучат и да го соберат најдобриот можен тим за Сингапур“.

Зголемувањето на платите ќе се спроведе во фази – општо зголемување од девет проценти за министрите е планирано за 15 октомври, а понатамошните зголемувања ќе бидат поврзани со учинокот и одговорностите.

Според платформата PoliticalSalaries.com, Вонг веќе е најплатениот шеф на влада во светот.

Во споредба со него, британскиот премиер Енди Бернам прима околу 174.000 британски фунти годишно (околу 197.000 евра), американскиот претседател Доналд Трамп 400.000 американски долари (приближно 343.000 евра), а германскиот канцелар Фридрих Мерц е шести на глобалната ранг-листа со основна плата од околу 321.000 евра годишно.