Најмладите преку куклена претстава учеа правила за безбедно движење по улиците

Општина Кисела Вода беше домаќин на превентивно-едукативен настан посветен на безбедноста на најмладите, кој се одржа денеска, во Домот на културата „Билјана Беличанец“.

Оваа активност е во организација на Републичкиот совет за безбедност на сообраќајот на патиштата (РСБСП), со поддршка од МВР, СВР Скопје и од Општина Кисела Вода.

Во рамките на кампањата „Да ги заштитиме децата во сообраќајот“, учениците од прво одделение од основните училишта „Круме Кепески“ и „Кирил Пејчиновиќ“ имаа можност преку специјално подготвена куклена претстава да учат за основните правила за безбедно движење по улиците.

Претставата ја проследија и: министерот за внатрешни работи, Панче Тошковски; градоначалничката на Општина Кисела, Вода, Бети Стаменкоска-Трајкоска; директорот на Бирото за јавна безбедност, Александар Јанев; претседателот на Републичкиот совет за безбедност на сообраќајот на патиштата (РСБСП), Горан Ангеловски, како и претставници на МВР и СВР Скопје.

– Безбедноста на нашите деца е наш приоритет, а едукацијата од најмали нозе е клучот за градење здрава сообраќајна култура. Има исклучителна корист од ваквите активности, бидејќи превенцијата секогаш дава најдобри и трајни резултати. Тесната меѓуинституционална соработка не е само фраза туку и неопходност. Само преку заеднички и координирани напори можеме реално да ја гарантираме сигурноста на нашите граѓани – истакна градоначалничката на Општина Кисела Вода, Бети Стаменкоска-Трајкоска.

Таа додаде дека паралелно со овие едукативни процеси, како локална самоуправа, континуирано работат и на унапредување на сообраќајната инфраструктура во целата општина.

– Нашата цел е да овозможиме безбедна инфраструктура и едуцирани учесници, кои ги почитуваат правилата – нагласи Стаменкоска-Трајкоска.

Кампањата „Да ги заштитиме децата во сообраќајот“ ќе продолжи и во наредниот период. Крајна цел на оваа заедничка заложба се континуираното зголемување на безбедноста на патиштата, минимизирањето на ризиците во сообраќајот и градењето генерации со висока сообраќајна свест.