Руските инженери започнаа со работа на првата нуклеарна централа во Казахстан, додека Москва се обидува да го задржи своето влијание во Централна Азија, каде што Кина и Европа се борат за упориште во регионот богат со ресурси.
Казахстан, најголемиот производител на ураниум во светот и трет најголем снабдувач на Европската Унија, денес соопшти дека руските и казахстанските нуклеарни агенции започнале инженерски студии за да ја утврдат најдобрата локација и да „подготват проектна документација“ за централата, објави „Москва тајмс“, повикувајќи се на АФП.
Електраната ќе биде изградена во близина на полунапуштеното село Улкен на езерото Балхаш и се очекува да бидат потребни неколку години за нејзино завршување. Руската „Росатом“ објави дека реакторот ќе има животен век од 60 години, со можност за продолжување за уште 20 години.
